dil ke dāman meñ jo sarmāya-e-afkār na thā
zindagī thī magar us kā koī me.aar na thā

jaane kyuuñ baat mirī un ko girāñ-bār huī
lafz aisā to koī shāmil-e-guftār na thā

kaun suntā mirī kis ko maiñ sadā.eñ detā
aisī ġhaflat thī ki ehsās bhī bedār na thā

har taraf dhuup thī phailī huī uryānī kī
sar chhupāne ko kahīñ sāya-e-kirdār na thā

āsmāñ chiir ke rakh detī sadārat merī
vo to kahiye koī dushman pas-e-dīvār na thā

zahr kā ghūñT bil-āḳhir use piinā hī paḌā
baat ye thī vo zamāne kā taraf-dār na thā

us kī begāna-ravī se use samjhā maiñ ne
tishnā-e-ḳhūn-e-vafā thā karam-e-āsār na thā

jis ko dekhā vo haqā.eq pe thā parda Daale
ā.īna-dār-e-haqīqat koī kirdār na thā

e.atibār-e-dil-e-pur-shauq bhī paidā karte
kaam aane kā faqat jazba-e-īsār na thā

kaam āñkhoñ se na lete to bhalā kyā karte
dard pinhāñ the bahut par lab-e-iz.hār na thā

sarfarāzī mirī qismat meñ na thī varna 'guhar'
nok-e-neza pe pahuñchnā koī dushvār na thā

dil ke daman mein jo sarmaya-e-afkar na tha
zindagi thi magar us ka koi mear na tha

jaane kyun baat meri un ko giran-bar hui
lafz aisa to koi shamil-e-guftar na tha

kaun sunta meri kis ko main sadaen deta
aisi ghaflat thi ki ehsas bhi bedar na tha

har taraf dhup thi phaili hui uryani ki
sar chhupane ko kahin saya-e-kirdar na tha

aasman chir ke rakh deti sadarat meri
wo to kahiye koi dushman pas-e-diwar na tha

zahr ka ghunT bil-aKHir use pina hi paDa
baat ye thi wo zamane ka taraf-dar na tha

us ki begana-rawi se use samjha main ne
tishna-e-KHun-e-wafa tha karam-e-asar na tha

jis ko dekha wo haqaeq pe tha parda Dale
aaina-dar-e-haqiqat koi kirdar na tha

eatibar-e-dil-e-pur-shauq bhi paida karte
kaam aane ka faqat jazba-e-isar na tha

kaam aankhon se na lete to bhala kya karte
dard pinhan the bahut par lab-e-izhaar na tha

sarfaraazi meri qismat mein na thi warna 'guhar'
nok-e-neza pe pahunchna koi dushwar na tha

Source: Book : Zarf-e-Gohar (Pg. 41) Author : Sayed-ul-Hassan Khan Publication : Sayed-ul-Hassan Khan (2016) Edition : 2016