vaqār de ke kabhī be-vaqār mat karnā
hameñ ḳhudā ke liye sharmsār mat karnā

nikalnā jab kabhī le kar charāġh bastī meñ
añdhere ghar bhī mileñge shumār mat karnā

usī kā aaj bhī ham intizār karte haiñ
jo kah gayā thā mirā intizār mat karnā

ye maanā aaj zamāna hai bevafā.ī kā
magar tum aisā chalan iḳhtiyār mat karnā

safar ke maare hue āsmān ke panchhī
sukūñ se baiThe haiñ un kā shikār mat karnā

dil iztirāb kī had se guzar gayā ai dost
nayā ab aur koī mujh pe vaar mat karnā

kahīñ bikhar ke na rah jaa.e ġham fazāoñ meñ
qabā-e-ġhuncha-e-dil tār-tār mat karnā

mirī ḳhatā ko karam kī ridā uḌhā denā
mujhe zamāne kī nazroñ meñ ḳhvār mat karnā

jab iḳhtilāf meñ sar ko uThā.e hoñ maujeñ
to ai 'guhar' kabhī dariyā ko paar mat karnā

waqar de ke kabhi be-waqar mat karna
hamein KHuda ke liye sharmsar mat karna

nikalna jab kabhi le kar charagh basti mein
andhere ghar bhi milenge shumar mat karna

usi ka aaj bhi hum intizar karte hain
jo kah gaya tha mera intizar mat karna

ye mana aaj zamana hai bewafai ka
magar tum aisa chalan iKHtiyar mat karna

safar ke mare hue aasman ke panchhi
sukun se baiThe hain un ka shikar mat karna

dil iztirab ki had se guzar gaya ai dost
naya ab aur koi mujh pe war mat karna

kahin bikhar ke na rah jae gham fazaon mein
qaba-e-ghuncha-e-dil tar-tar mat karna

meri KHata ko karam ki rida uDha dena
mujhe zamane ki nazron mein KHwar mat karna

jab iKHtilaf mein sar ko uThae hon maujen
to ai 'guhar' kabhi dariya ko par mat karna

Source: Book : Aab-e-Gohar (Pg. 41) Author : Sayed-ul_Hassan Khan Publication : Sayed-ul-Hassan Khan (1995) Edition : 1995