mirī āh-o-fuġhāñ kuchh bhī nahīñ hai
jale dil kā dhuāñ kuchh bhī nahīñ hai

na taḌpāyā kisī zālim ko us ne
mirī tarz-e-bayāñ kuchh bhī nahīñ hai

jahāñ ho bijliyoñ kā ḳhauf paiham
sukūn-e-āshiyāñ kuchh bhī nahīñ hai

har ik shai ban ga.ī shīshe kī mānind
ab apne darmiyāñ kuchh bhī nahīñ hai

ḳhudā go zarre zarre se ayaañ hai
magar zarra yahāñ kuchh bhī nahīñ hai

jo dekho to sabhī kuchh hai jahāñ meñ
jo samjho to jahāñ kuchh bhī nahīñ hai

tavānā.ī kī duniyā meñ ai 'maġhmūm'
bisāt-e-nā-tavāñ kuchh bhī nahīñ hai

meri aah-o-fughan kuchh bhi nahin hai
jale dil ka dhuan kuchh bhi nahin hai

na taDpaya kisi zalim ko us ne
meri tarz-e-bayan kuchh bhi nahin hai

jahan ho bijliyon ka KHauf paiham
sukun-e-ashiyan kuchh bhi nahin hai

har ek shai ban gai shishe ki manind
ab apne darmiyan kuchh bhi nahin hai

KHuda go zarre zarre se ayan hai
magar zarra yahan kuchh bhi nahin hai

jo dekho to sabhi kuchh hai jahan mein
jo samjho to jahan kuchh bhi nahin hai

tawanai ki duniya mein ai 'maghmum'
bisat-e-na-tawan kuchh bhi nahin hai

Source: Book : SAAZ-O-NAVA (Pg. 253) Publication : Raghu Nath suhai ummid