Subscribe to our newsletter and get our newest updates

Gopal Mittal

  • Ghazal


kis ko hai husn-e-KHuda-dad ka dawa dekhen


kis ko hai husn-e-ḳhudā-dād kā da.avā dekheñ
kis kā chehra nahīñ minnat-kash-e-ġhāza dekheñ

jo muqaddar hai vo anjām-e-tamannā dekheñ
dil-e-vahshat-zada chal aaj use jā dekheñ

dil ye kahtā hai ki husn us kā jahāñ-tāb bhī ho
aur phir ye bhī hai ki ham hī use tanhā dekheñ

aao kuchh jashn-e-shahādat hī meñ shirkat ho jaa.e
apnī khiḌkī hī se maqtal kā nazāra dekheñ

kaun mañjdhār meñ jaa.e sar-e-sāhil baiTheñ
duur se Dūbne vāloñ kā tamāshā dekheñ

ab bhī hotā hai vahāñ zikr hamārā ki nahīñ
aalam us bazm kā ab kyā hai zarā jā dekheñ

kis ko hai husn-e-KHuda-dad ka dawa dekhen
kis ka chehra nahin minnat-kash-e-ghaza dekhen

jo muqaddar hai wo anjam-e-tamanna dekhen
dil-e-wahshat-zada chal aaj use ja dekhen

dil ye kahta hai ki husn us ka jahan-tab bhi ho
aur phir ye bhi hai ki hum hi use tanha dekhen

aao kuchh jashn-e-shahadat hi mein shirkat ho jae
apni khiDki hi se maqtal ka nazara dekhen

kaun manjdhaar mein jae sar-e-sahil baiThen
dur se Dubne walon ka tamasha dekhen

ab bhi hota hai wahan zikr hamara ki nahin
aalam us bazm ka ab kya hai zara ja dekhen


Source: Book : Mujalla Dastavez (Pg. 191) Author : Aziz Nabeel Publication : Edarah Dastavez (2013-14) Edition : 2013-14

Leave a comment

+