mujh pe tū mehrbān hai pyāre
ye bhī ik imtihān hai pyāre

ye tirā āstān jalva hai
mere dil kī bhī shaan hai pyāre

kaun kahtā hai bevafā tujh ko
kis ke muñh meñ zabān hai pyāre

āshiqī aur shikva-e-bedād
ye tujhe kyā gumān hai pyāre

tere kūche kā vaah kyā kahnā
ye zamīñ āsmān hai pyāre

hai fasāna agar jahāñ to ishq
is fasāne kī jaan hai pyāre

tū salāmat rahe tire dam se
dil kī duniyā javān hai pyāre

haa.e vo dāstān-e-ġham jis kī
ḳhāmushī tarjumān hai pyāre

dil kī betābiyoñ kā haal na pūchh
ek aafat meñ jaan hai pyāre

ham bhī urdu pe naaz karte haiñ
ye hamārī zabān hai pyāre

mujh pe tu mehrban hai pyare
ye bhi ek imtihan hai pyare

ye tera aastan jalwa hai
mere dil ki bhi shan hai pyare

kaun kahta hai bewafa tujh ko
kis ke munh mein zaban hai pyare

aashiqi aur shikwa-e-bedad
ye tujhe kya guman hai pyare

tere kuche ka wah kya kahna
ye zamin aasman hai pyare

hai fasana agar jahan to ishq
is fasane ki jaan hai pyare

tu salamat rahe tere dam se
dil ki duniya jawan hai pyare

hae wo dastan-e-gham jis ki
KHamushi tarjuman hai pyare

dil ki betabiyon ka haal na puchh
ek aafat mein jaan hai pyare

hum bhi urdu pe naz karte hain
ye hamari zaban hai pyare

Source: Book : Kulliyat-e-gopal mittal (Pg. 145) Author : Gopal Mittal Publication : Modern Publishing House, Daryaganj New delhi (1994) Edition : 1994