daulat-e-dard sameTo ki bikharne ko hai
raat kā āḳhirī lamha bhī guzarne ko hai

ḳhisht-dar-ḳhisht aqīdat ne banāyā jis ko
abr-e-āzār usī ghar pe Thaharne ko hai

kisht-e-barbād se tajdīd-e-vafā kar dekho
ab to dariyāoñ kā paanī bhī utarne ko hai

apnī āñkhoñ meñ vahī aks liye phirte haiñ
jaise ā.īna-e-maqsūm sañvarne ko hai

jo Dubo.egī na pahuñchā.egī sāhil pe hameñ
ab vahī mauj samundar se ubharne ko hai

kunj-e-tanhā.ī meñ khiltā hai taḳhayyul merā
aur maiñ ḳhush huuñ ki ye gul phir se nikharne ko hai

daulat-e-dard sameTo ki bikharne ko hai
raat ka aaKHiri lamha bhi guzarne ko hai

KHisht-dar-KHisht aqidat ne banaya jis ko
abr-e-azar usi ghar pe Thaharne ko hai

kisht-e-barbaad se tajdid-e-wafa kar dekho
ab to dariyaon ka pani bhi utarne ko hai

apni aankhon mein wahi aks liye phirte hain
jaise aaina-e-maqsum sanwarne ko hai

jo Duboegi na pahunchaegi sahil pe hamein
ab wahi mauj samundar se ubharne ko hai

kunj-e-tanhai mein khilta hai taKHayyul mera
aur main KHush hun ki ye gul phir se nikharne ko hai