Subscribe to our newsletter and get our newest updates

Ghulam Rabbani Taban

  • Ghazal


daur-e-tufan mein bhi ji lete hain jine wale


daur-e-tūfāñ meñ bhī jī lete haiñ jiine vaale
duur sāhil se kisī mauj-e-gurezāñ kī tarah

dil kī vaadī meñ tirā dard barastā hī rahā
abr-e-naisāñ kī tarah abr-e-bahārāñ kī tarah

fāsle vaqt meñ tabdīl hue jaate haiñ
zindagī raqs meñ hai gardish-e-daurāñ kī tarah

dil kī taskīn ko māñge kā ujālā kahiye
raat ik shoḳh kī yaad aa.ī thī mehmāñ kī tarah

aarzū aur zamāne kī kashākash se gurez
zindagī aur charāġh-e-tah-e-dāmāñ kī tarah

gar na ho ḳhātir nāzuk pe garāñ to kah duuñ
baat bhī dil meñ utar jaatī hai paikāñ kī tarah

ek tasvīr banī sarhad-e-iz.hār se duur
nutq hairāñ hai mire dīda-e-hairāñ kī tarah

chāñd nikhrā hai tirī lauh-e-jabīñ kī sūrat
raat bikhrī hai tirī zulf-e-pareshāñ kī tarah

kis ne hañs hañs ke piyā zahr-e-malāmat paiham
kaun rusvā sar-e-bāzār hai 'tābāñ' kī tarah

daur-e-tufan mein bhi ji lete hain jine wale
dur sahil se kisi mauj-e-gurezan ki tarah

dil ki wadi mein tera dard barasta hi raha
abr-e-naisan ki tarah abr-e-bahaaran ki tarah

fasle waqt mein tabdil hue jate hain
zindagi raqs mein hai gardish-e-dauran ki tarah

dil ki taskin ko mange ka ujala kahiye
raat ek shoKH ki yaad aai thi mehman ki tarah

aarzu aur zamane ki kashakash se gurez
zindagi aur charagh-e-tah-e-daman ki tarah

gar na ho KHatir nazuk pe garan to kah dun
baat bhi dil mein utar jati hai paikan ki tarah

ek taswir bani sarhad-e-izhaar se dur
nutq hairan hai mere dida-e-hairan ki tarah

chand nikhra hai teri lauh-e-jabin ki surat
raat bikhri hai teri zulf-e-pareshan ki tarah

kis ne hans hans ke piya zahr-e-malamat paiham
kaun ruswa sar-e-bazar hai 'taban' ki tarah


Source: Funoon(Jadeed Ghazal Number: Volume-002)

Leave a comment

+