ek tum hī nahīñ duniyā meñ jafākār bahut
dil salāmat hai to dil ke liye āzār bahut

haa.e kyā chiiz hai mahrūmī-o-ġham kā rishta
mil ga.e ziist ke har moḌ pe ġham-ḳhvār bahut

yād-e-ahbāb kī ḳhushbū se mahaktī shāmeñ
kuchh kaho hotī haiñ kambaḳht dil-āzār bahut

ishq-e-āvāra kahāñ qaid-e-dar-o-bām kahāñ
be-navāoñ ke liye sāya-e-dīvār bahut

dil kī raftār badal jaatī thī āvāz ke saath
yaad aatā hai vo pairāya-e-guftār bahut

ek din vaqt batā.egā junūñ kī azmat
yuuñ to ham log haiñ rusvā sar-e-bāzār bahut

vo kashākash hai ki jiinā bhī hai dūbhar 'tābāñ'
ishq ma.asūm bahut husn fusūñ-kār bahut

ek tum hi nahin duniya mein jafakar bahut
dil salamat hai to dil ke liye aazar bahut

hae kya chiz hai mahrumi-o-gham ka rishta
mil gae zist ke har moD pe gham-KHwar bahut

yaad-e-ahbab ki KHushbu se mahakti shamen
kuchh kaho hoti hain kambaKHt dil-azar bahut

ishq-e-awara kahan qaid-e-dar-o-baam kahan
be-nawaon ke liye saya-e-diwar bahut

dil ki raftar badal jati thi aawaz ke sath
yaad aata hai wo pairaya-e-guftar bahut

ek din waqt bataega junun ki azmat
yun to hum log hain ruswa sar-e-bazar bahut

wo kashakash hai ki jina bhi hai dubhar 'taban'
ishq masum bahut husn fusun-kar bahut

Source: Funoon(Jadeed Ghazal Number: Volume-002)