Warning: session_start(): open(/tmp/sess_jh2m620cj2ils03f4qut2iece6, O_RDWR) failed: No space left on device (28) in /razi/eraazi/darbari/chunmun/index.php on line 15
rahguzar ho ya musafir nind jis ko aae hai

Subscribe to our newsletter and get our newest updates

Ghulam Rabbani Taban

  • Ghazal


rahguzar ho ya musafir nind jis ko aae hai


rahguzar ho yā musāfir niiñd jis ko aa.e hai
gard kī mailī sī chādar oḌh ke so jaa.e hai

qurbateñ hī qurbateñ haiñ dūriyāñ hī dūriyāñ
aarzū jaadū ke sahrā meñ mujhe dauḌāye hai

vaqt ke hāthoñ zamīr-e-shahr bhī maarā gayā
rafta rafta mauj-e-ḳhūñ sar se guzartī jaa.e hai

merī āshufta-sarī vaj.h-e-shanāsā.ī huī
mujh se milne roz koī hādisa aa jaa.e hai

yuuñ to ik harf-e-tasallī bhī baḌī shai hai magar
aisā lagtā hai vafā be-ābrū ho jaa.e hai

zindagī kī talḳhiyāñ detī haiñ ḳhvāboñ ko janam
tishnagī sahrā meñ dariyā kā samāñ dikhlā.e hai

kis tarah dast-e-hunar meñ bolne lagte haiñ rañg
madrase vāloñ ko 'tābāñ' kaun samjhā paa.e hai

rahguzar ho ya musafir nind jis ko aae hai
gard ki maili si chadar oDh ke so jae hai

qurbaten hi qurbaten hain duriyan hi duriyan
aarzu jadu ke sahra mein mujhe dauDaye hai

waqt ke hathon zamir-e-shahr bhi mara gaya
rafta rafta mauj-e-KHun sar se guzarti jae hai

meri aashufta-sari wajh-e-shanasai hui
mujh se milne roz koi hadisa aa jae hai

yun to ek harf-e-tasalli bhi baDi shai hai magar
aisa lagta hai wafa be-abru ho jae hai

zindagi ki talKHiyan deti hain KHwabon ko janam
tishnagi sahra mein dariya ka saman dikhlae hai

kis tarah dast-e-hunar mein bolne lagte hain rang
madrase walon ko 'taban' kaun samjha pae hai


Source: Rooh-e-Ghazal,Pachas Sala Intekhab

Leave a comment

+