baat baḌhtī ga.ī aage mirī nādānī se
kitnā arzāñ huā maiñ apnī farāvānī se

ḳhaak hī ḳhaak nazar aa.ī mujhe chāroñ taraf
jal ga.e chāñd sitāre mirī tābānī se

be-tahāsha jiye ham log hameñ hosh nahīñ
vaqt ārām se guzrā ki pareshānī se

ab mire gird Thahartī nahīñ dīvār koī
bandisheñ haar ga.iiñ be-sar-o-sāmānī se

aa.egā aisā bhī ik moḌ safar meñ 'rāhī'
gard bhī merī na pāoge tum āsānī se

baat baDhti gai aage meri nadani se
kitna arzan hua main apni farawani se

KHak hi KHak nazar aai mujhe chaaron taraf
jal gae chand sitare meri tabani se

be-tahasha jiye hum log hamein hosh nahin
waqt aaram se guzra ki pareshani se

ab mere gird Thaharti nahin diwar koi
bandishen haar gain be-sar-o-samani se

aaega aisa bhi ek moD safar mein 'rahi'
gard bhi meri na paoge tum aasani se