āsūda-e-mahfil abhī dam bhar na huā thā
vo kaun sā thā vaar jo mujh par na huā thā

chashm-e-sitam-ījād kī vus.at ke muqābil
ye teġh to kyā charḳh-e-sitamgar na huā thā

palkoñ hī pe taḌpā vo mire soz-e-darūñ se
jo ashk abhī baḌh ke samundar na huā thā

jab tak ki na dekhī thī nigāhoñ kī karāmat
maiñ munharif-e-bāda-o-sāġhar na huā thā

jab tak na thā shah-e-rag pe paḌā sāya-e-abrū
maiñ vāqif-e-shīrīnī-e-ḳhanjar na huā thā

kyā jāneñ nazar aayā hai kyā rang-e-mohabbat
itnā kabhī muztar dil-e-muztar na huā thā

ai 'tāj' ajab josh uThā bahr-e-karam meñ
ik harf-e-duā bhī to mukarrar na huā thā

aasuda-e-mahfil abhi dam bhar na hua tha
wo kaun sa tha war jo mujh par na hua tha

chashm-e-sitam-ijad ki wusat ke muqabil
ye tegh to kya charKH-e-sitamgar na hua tha

palkon hi pe taDpa wo mere soz-e-darun se
jo ashk abhi baDh ke samundar na hua tha

jab tak ki na dekhi thi nigahon ki karamat
main munharif-e-baada-o-saghar na hua tha

jab tak na tha shah-e-rag pe paDa saya-e-abru
main waqif-e-shirini-e-KHanjar na hua tha

kya jaanen nazar aaya hai kya rang-e-mohabbat
itna kabhi muztar dil-e-muztar na hua tha

ai 'taj' ajab josh uTha bahr-e-karam mein
ek harf-e-dua bhi to mukarrar na hua tha