parda āñkhoñ se haTāne meñ bahut der lagī
hameñ duniyā nazar aane meñ bahut der lagī

nazar aatā hai jo vaisā nahīñ hotā koī shaḳhs
ḳhud ko ye baat batāne meñ bahut der lagī

ek dīvār uThā.ī thī baḌī ujlat meñ
vahī dīvār girāne meñ bahut der lagī

aag hī aag thī aur log bahut chāroñ taraf
apnā to dhyān hī aane meñ bahut der lagī

jis tarah ham kabhī honā hī nahīñ chāhte the
ḳhud ko phir vaisā banāne meñ bahut der lagī

ye huā tū ki har ik shai kī kashish maañd paḌī
magar is moḌ pe aane meñ bahut der lagī

parda aankhon se haTane mein bahut der lagi
hamein duniya nazar aane mein bahut der lagi

nazar aata hai jo waisa nahin hota koi shaKHs
KHud ko ye baat batane mein bahut der lagi

ek diwar uThai thi baDi ujlat mein
wahi diwar girane mein bahut der lagi

aag hi aag thi aur log bahut chaaron taraf
apna to dhyan hi aane mein bahut der lagi

jis tarah hum kabhi hona hi nahin chahte the
KHud ko phir waisa banane mein bahut der lagi

ye hua tu ki har ek shai ki kashish mand paDi
magar is moD pe aane mein bahut der lagi

RECITATIONS Azra Naqvi



00:00/00:00 Parda ankhon se hatane mein bhut der lagi Azra Naqvi

Source: Book : Ghazal Calendar-2015 (Pg. 27.12.2015)