savād-e-shahr se aġhmāz karnā chāhtā huuñ
ki maiñ apnā safar āġhāz karnā chāhtā huuñ

ḳhajil hūñgā matā-e-ishq par shāyad kisī din
abhī is faisle par naaz karnā chāhtā huuñ

rag-e-jāñ se bhī jo nazdīk aatā jā rahā hai
maiñ kyā sach-much use hamrāz karnā chāhtā huuñ

ulaTnā chāhtā huuñ aaj maazī ke varaq maiñ
ki fardā kā darīcha baaz karnā chāhtā huuñ

kisī ke sāmne rakkhe hue ik aa.ine ko
maiñ apnī ruuh kā ġhammāz karnā chāhtā huuñ

parindoñ ko zarā sī der chup rahne kā kah kar
havā ko zamzama-pardāz karnā chāhtā huuñ

manānā chāhtā huuñ rūThne vāloñ ko 'sājid'
magar ik shaḳhs ko nārāz karnā chāhtā huuñ

sawad-e-shahr se aghmaz karna chahta hun
ki main apna safar aaghaz karna chahta hun

KHajil hunga mata-e-ishq par shayad kisi din
abhi is faisle par naz karna chahta hun

rag-e-jaan se bhi jo nazdik aata ja raha hai
main kya sach-much use hamraaz karna chahta hun

ulaTna chahta hun aaj mazi ke waraq main
ki farda ka daricha baz karna chahta hun

kisi ke samne rakkhe hue ek aaine ko
main apni ruh ka ghammaz karna chahta hun

parindon ko zara si der chup rahne ka kah kar
hawa ko zamzama-pardaz karna chahta hun

manana chahta hun ruThne walon ko 'sajid'
magar ek shaKHs ko naraaz karna chahta hun