Subscribe to our newsletter and get our newest updates

Ghulam Husain Sajid

  • Ghazal


samajhte hain jo apne bap ki jagir miTTi ko


samajhte haiñ jo apne baap kī jāgīr miTTī ko
banā.ūñgā maiñ un ke paañv kī zanjīr miTTī ko

havā sat.h-e-zamīñ par ab ḳhat-e-gulzār khīñchegī
ki ḳhush aatī nahīñ hai abr kī tahrīr miTTī ko

siyah paḌ jā.egī zarroñ kī rañgat ek hī pal meñ
agar qismat se mil jaa.e mirī taqdīr miTTī ko

jalālī aa.ina ik āsmāñ par mehr-e-tābāñ hai
banāyā hai zamīñ par sabr kī tasvīr miTTī ko

bajā.e ḳhaak uḌte haiñ sitāre merī āñkhoñ meñ
ki ho jaatī hai aise kaam meñ tāḳhīr miTTī ko

use mismār karne meñ koī mushkil nahīñ hogī
pasand aa.ī hai shahr-e-ḳhvāb kī ta.amīr miTTī ko

bahut rauñdā gayā hai ḳhaak ko aur ḳhāk-zādoñ ko
atā kī jā.egī ab ġhaib se tauqīr miTTī ko

kamāl apnā dikhā.egā tilismī aa.ina 'sājid'
ki ab darkār hai ik ḳhvāb kī ta.abīr miTTī ko

samajhte hain jo apne bap ki jagir miTTi ko
banaunga main un ke panw ki zanjir miTTi ko

hawa sath-e-zamin par ab KHat-e-gulzar khinchegi
ki KHush aati nahin hai abr ki tahrir miTTi ko

siyah paD jaegi zarron ki rangat ek hi pal mein
agar qismat se mil jae meri taqdir miTTi ko

jalali aaina ek aasman par mehr-e-taban hai
banaya hai zamin par sabr ki taswir miTTi ko

bajae KHak uDte hain sitare meri aankhon mein
ki ho jati hai aise kaam mein taKHir miTTi ko

use mismar karne mein koi mushkil nahin hogi
pasand aai hai shahr-e-KHwab ki tamir miTTi ko

bahut raunda gaya hai KHak ko aur KHak-zadon ko
ata ki jaegi ab ghaib se tauqir miTTi ko

kamal apna dikhaega tilismi aaina 'sajid'
ki ab darkar hai ek KHwab ki tabir miTTi ko


Source: Book : Urdu Adab (Pg. 52) Author : Iqbal Hussain Publication : Iqbal Hussain Publishers (Jan, Feb. Mar 1996) Edition : Jan, Feb. Mar 1996

Leave a comment

+