sub.h tak jin se bahut bezār ho jaatā huuñ maiñ
raat hote hī unhī galiyoñ meñ kho jaatā huuñ maiñ

ḳhvāb meñ gum huuñ ki bāhar kī fazā achchhī nahīñ
aañkh khulte hī kahīñ zanjīr ho jaatā huuñ maiñ

khīñch laatī hai usī kūche meñ phir āvārgī
roz jis kūche se apne shahr ko jaatā huuñ maiñ

is añdhere meñ charāġh-e-ḳhvāb kī ḳhvāhish nahīñ
ye bhī kyā kam hai ki thoḌī der so jaatā huuñ maiñ

raat laatī hai kisī ke qurb kī ḳhvāhish magar
sub.h hote hī kisī se duur ho jaatā huuñ maiñ

jī meñ aatā hai ki duniyā ko badalnā chāhiye
aur apne aap se māyūs ho jaatā huuñ maiñ

baare bāġh-e-sehn-e-duniyā meñ bahut din rah liyā
ḳhush raho ab is galī se dosto jaatā huuñ maiñ

subh tak jin se bahut bezar ho jata hun main
raat hote hi unhi galiyon mein kho jata hun main

KHwab mein gum hun ki bahar ki faza achchhi nahin
aankh khulte hi kahin zanjir ho jata hun main

khinch lati hai usi kuche mein phir aawargi
roz jis kuche se apne shahr ko jata hun main

is andhere mein charagh-e-KHwab ki KHwahish nahin
ye bhi kya kam hai ki thoDi der so jata hun main

raat lati hai kisi ke qurb ki KHwahish magar
subh hote hi kisi se dur ho jata hun main

ji mein aata hai ki duniya ko badalna chahiye
aur apne aap se mayus ho jata hun main

bare bagh-e-sehn-e-duniya mein bahut din rah liya
KHush raho ab is gali se dosto jata hun main

Source: Book : AURAAQ (Pg. 253) Author : Wazir Agha, Sajjad Naqvi Publication : Auraaq Chauk, Urdu Bazar, Lahore (April, May 1982) Edition : April, May 1982