ziist kā ḳhālī kaTorā aap hī bhar jā.egā
apne hī jaisā kisī din vo mujhe kar jā.egā

shahr meñ koī na rah pā.egā benām-o-nishāñ
jis taraf shīshe kī yūrish hogī patthar jā.egā

naddiyāñ ab bhāgtī phirtī haiñ sahrā kī taraf
ab to dariyā ke ta.āqub meñ samundar jā.egā

kho chuke haiñ log apne apne chehroñ kā vaqār
jo bhī jā.egā tirā ham-shakl ban kar jā.egā

vo utarvā legā hoñToñ se libās-e-ḳhāmushī
vo yahāñ koī na koī gul khilā kar jā.egā

maiñ huuñ apne daur ke ik sāhab-e-fan kā kamāl
aane vaalā mujh pe do aañsū bahā kar jā.egā

jitnī duurī se sadā dete haiñ mujh ko vo 'ayāz'
us bulandī par kahāñ merā muqaddar jā.egā

zist ka KHali kaTora aap hi bhar jaega
apne hi jaisa kisi din wo mujhe kar jaega

shahr mein koi na rah paega benam-o-nishan
jis taraf shishe ki yurish hogi patthar jaega

naddiyan ab bhagti phirti hain sahra ki taraf
ab to dariya ke taaqub mein samundar jaega

kho chuke hain log apne apne chehron ka waqar
jo bhi jaega tera ham-shakl ban kar jaega

wo utarwa lega honTon se libas-e-KHamushi
wo yahan koi na koi gul khila kar jaega

main hun apne daur ke ek sahab-e-fan ka kamal
aane wala mujh pe do aansu baha kar jaega

jitni duri se sada dete hain mujh ko wo 'ayaz'
us bulandi par kahan mera muqaddar jaega

Source: Rooh-e-Ghazal,Pachas Sala Intekhab