Subscribe to our newsletter and get our newest updates

Ghani Ejaz

  • Ghazal


junun mein der se KHud ko pukarta hun main


junūñ meñ der se ḳhud ko pukārtā huuñ maiñ
jo ġham hai dāman-e-sahrā meñ vo sadā huuñ maiñ

badal gayā hai zamāna badal gayā huuñ maiñ
ab apnī samt bhī hairat se dekhtā huuñ maiñ

hayāt ek sazā hai bhagat rahā huuñ maiñ
dar-e-qubūl se lauTī huī duā huuñ maiñ

jise ḳhud aap hī apne pe pyaar aa jaa.e
jafā ke daur meñ vo laġhzish-e-vafā huuñ maiñ

jamāl-e-yār kī ra.anā.iyāñ ma.āz-allāh
nigāh ban ke nazāroñ meñ kho gayā huuñ maiñ

bas ek jumbish-e-lab tak vajūd hai jis kā
zabān-e-shauq pe vo harf-e-mudda.ā huuñ maiñ

agar hai jurm mohabbat to phir takalluf kyā
madār-e-jurm huuñ taqsīr huuñ ḳhatā huuñ maiñ

rafāqatoñ ke ye fānūs tā-ba-kai 'ejāz'
havā kī zad pe laraztā huā diyā huuñ maiñ

junun mein der se KHud ko pukarta hun main
jo gham hai daman-e-sahra mein wo sada hun main

badal gaya hai zamana badal gaya hun main
ab apni samt bhi hairat se dekhta hun main

hayat ek saza hai bhagat raha hun main
dar-e-qubul se lauTi hui dua hun main

jise KHud aap hi apne pe pyar aa jae
jafa ke daur mein wo laghzish-e-wafa hun main

jamal-e-yar ki ranaiyan maaz-allah
nigah ban ke nazaron mein kho gaya hun main

bas ek jumbish-e-lab tak wajud hai jis ka
zaban-e-shauq pe wo harf-e-muddaa hun main

agar hai jurm mohabbat to phir takalluf kya
madar-e-jurm hun taqsir hun KHata hun main

rafaqaton ke ye fanus ta-ba-kai 'ejaz'
hawa ki zad pe larazta hua diya hun main


Source: Nashuneeda

Leave a comment

+