Subscribe to our newsletter and get our newest updates

Gauhar Usmani

  • Ghazal


teri taswir ko dhundla nahin hone denge


terī tasvīr ko dhuñdlā nahīñ hone deñge
zindagī ham tujhe rusvā nahīñ hone deñge

sar pe har lamha raheñge tire āñchal kī tarah
tū ġhazal hai tujhe tanhā nahīñ hone deñge

jin makānoñ se hai mansūb ḳhudā kī azmat
un makānoñ meñ añdherā nahīñ hone deñge

jaan jaatī hai chalī jaa.e balā se lekin
ham mohabbat ko tamāshā nahīñ hone deñge

jin ko saa.e meñ gunāhoñ ko panāheñ mil jaa.eñ
un fasīloñ ko ab ūñchā nahīñ hone deñge

paar kar le jo qanā.at kī hadoñ ko 'gauhar'
itnā dāman ko kushāda nahīñ hone deñge

teri taswir ko dhundla nahin hone denge
zindagi hum tujhe ruswa nahin hone denge

sar pe har lamha rahenge tere aanchal ki tarah
tu ghazal hai tujhe tanha nahin hone denge

jin makanon se hai mansub KHuda ki azmat
un makanon mein andhera nahin hone denge

jaan jati hai chali jae bala se lekin
hum mohabbat ko tamasha nahin hone denge

jin ko sae mein gunahon ko panahen mil jaen
un fasilon ko ab uncha nahin hone denge

par kar le jo qanaat ki hadon ko 'gauhar'
itna daman ko kushada nahin hone denge


Source: Book : Idraaq (Pg. 85) Author : Gohar Usmani Publication : Gohar Usmani (1993) Edition : 1993

Leave a comment

+