matā-e-ishq zarā aur sarf-e-nāz to ho
tazzī-e-umr kā āḳhir koī javāz to ho

ba-ham-digar koī shab us se lab-ba-lab to chale
havā-e-shauq kuchh ālūda-e-majāz to ho

qadam qadam koī saaya sā muttasil to rahe
sarāb kā ye sar-e-silsila darāz to ho

vo kam-suḳhan na kam-āmez phir takalluf kyā
kuchh us se baat to Thahre kuchh us se saaz to ho

vafā se manzil-e-tark-e-vafā tak aa nikle
kisī bahāne to patthar kabhī gudāz to ho

shafaq kināyā-e-lab shaam istāra-e-zulf
kabhī ḳhayāl vasīloñ se be-niyāz to ho

huzūr-e-nāz abas hai ḳhayāl-e-jāñ 'gauhar'
niyāz mahram-e-ḳhamyāza-e-niyāz to ho

mata-e-ishq zara aur sarf-e-naz to ho
tazzi-e-umr ka aaKHir koi jawaz to ho

ba-ham-digar koi shab us se lab-ba-lab to chale
hawa-e-shauq kuchh aaluda-e-majaz to ho

qadam qadam koi saya sa muttasil to rahe
sarab ka ye sar-e-silsila daraaz to ho

wo kam-suKHan na kam-amez phir takalluf kya
kuchh us se baat to Thahre kuchh us se saz to ho

wafa se manzil-e-tark-e-wafa tak aa nikle
kisi bahane to patthar kabhi gudaz to ho

shafaq kinaya-e-lab sham istara-e-zulf
kabhi KHayal wasilon se be-niyaz to ho

huzur-e-naz abas hai KHayal-e-jaan 'gauhar'
niyaz mahram-e-KHamyaza-e-niyaz to ho

Source: Funoon(Jadeed Ghazal Number: Volume-002)