na ġhurūr hai ḳhirad ko na junūñ meñ bāñkpan hai
ye mizāj-e-zindagī to baḌā hausla-shikan hai

jahāñ mil sakeñ na mil ke jahāñ fāsle hoñ dil ke
use anjuman na samjho vo fareb-e-anjuman hai

ye havā chalī hai kaisī ki diloñ kī dhaḌkanoñ meñ
na hadīs-e-lāla-o-gul na hikāyat-e-chaman hai

nahīñ maslahat ki rahbar koī baat sach batā de
zarā kārvāñ se pūchho jo shikast jo thakan hai

ka.ī inqalāb aa.e ka.ī diip jhilmilā.e
jo bujhī nahīñ hai ab tak tirī yaad kī kiran hai

maiñ ġhamoñ kī tīrgī meñ nahīñ is qadar bhī tanhā
koī mujh se duur rah kar mire dil meñ zau-fagan hai

nahīñ sab ke saath yaksāñ safar-e-hayāt pyāre
kahīñ rañg-o-bū ke saa.e kahīñ dasht-e-pur-mehan hai

na ghurur hai KHirad ko na junun mein bankpan hai
ye mizaj-e-zindagi to baDa hausla-shikan hai

jahan mil saken na mil ke jahan fasle hon dil ke
use anjuman na samjho wo fareb-e-anjuman hai

ye hawa chali hai kaisi ki dilon ki dhaDkanon mein
na hadis-e-lala-o-gul na hikayat-e-chaman hai

nahin maslahat ki rahbar koi baat sach bata de
zara karwan se puchho jo shikast jo thakan hai

kai inqalab aae kai dip jhilmilae
jo bujhi nahin hai ab tak teri yaad ki kiran hai

main ghamon ki tirgi mein nahin is qadar bhi tanha
koi mujh se dur rah kar mere dil mein zau-fagan hai

nahin sab ke sath yaksan safar-e-hayat pyare
kahin rang-o-bu ke sae kahin dasht-e-pur-mehan hai

Source: Silsila Takallum Ka