Subscribe to our newsletter and get our newest updates

Shamim Hashimi

  • Ghazal

Gam Khaar mil gaya to sambhalnay lagi hai shaam


Gam Khaar mil gaya to sambhalnay lagi hai shaam
Meri rafaaaqatoN se bahalnay lagi hai shaam

Sooraj ke qahr se ye chhupi thi yahiN kahiN
Jab dhal gaya hai din to bahalne lagi hai shaam

Dosheeza e shafaq ka hai chehra haya se surKh
Aanchal me uske chhup ke machalnay lagi hai shaam

Niglay na usko qabr ki soorat siyaah raat
Is Gam se boond boond pighalne lagi hai shaam

Is ko udaasiyoN ke siwa jab na kuchh milaa
Meray Gareeb Khaanay se talnay lagi hai shaam

Jb shahr e dil me thi to badi Khushgawaar thi
Shahr e hawas me aayi to jalnay lagi hai shaam

Deewaar o dar ki Khatm huwi ab chahal pahal
Khaana badosh ghar se nikalnay lagi hai shaam

Kya jaanay is ka mujhse taAlluq hai kya Shamim
Kyu meray aas paas tahalne lagi hai shaam

MatbooAh “Azkaar” Shumaara 61, September 2009, Page 65, Urdu Academy Karnatak, Bangalore.

Leave a comment

+