ga.e dinoñ kā havāla thā kaam kyā detā
guzar gayā vo javāb-e-salām kyā detā

dayār-e-shab se bhī aage mirā safar thā bahut
so merā saath vo māh-e-tamām kyā detā

maiñ is ḳharāba-e-dil ke ujaaḌ manzar meñ
kisī ko dāvat-e-sair-o-qayām kyā detā

jo tū na aatā to rañg-e-fasurdagī ke sivā
mirī nigāh ko ye husn-e-shām kyā detā

shikasta-pā.ī pe jab mutma.in the rāhravāñ
maiñ qāfile ko duā-e-ḳhirām kyā detā

mujhe ḳhabar hai sarisht-e-sifāl meñ hai zavāl
maiñ apne dil ko fareb-e-davām kyā detā

maiñ kūza-gar kī dukāñ par rakhā rahā tā-umr
koī charāġh-e-shikasta ke daam kyā detā

usī se mujh ko mohabbat usī se nafrat bhī
maiñ us ta.alluq-e-ḳhātir ko naam kyā detā

ye shahr ho gayā ḳhālī suḳhan-shanāsoñ se
yahāñ koī mujhe dād-e-kalām kyā detā

gae dinon ka hawala tha kaam kya deta
guzar gaya wo jawab-e-salam kya deta

dayar-e-shab se bhi aage mera safar tha bahut
so mera sath wo mah-e-tamam kya deta

main is KHaraba-e-dil ke ujaD manzar mein
kisi ko dawat-e-sair-o-qayam kya deta

jo tu na aata to rang-e-fasurdagi ke siwa
meri nigah ko ye husn-e-sham kya deta

shikasta-pai pe jab mutmain the rahrawan
main qafile ko dua-e-KHiram kya deta

mujhe KHabar hai sarisht-e-sifal mein hai zawal
main apne dil ko fareb-e-dawam kya deta

main kuza-gar ki dukan par rakha raha ta-umr
koi charagh-e-shikasta ke dam kya deta

usi se mujh ko mohabbat usi se nafrat bhi
main us talluq-e-KHatir ko nam kya deta

ye shahr ho gaya KHali suKHan-shanason se
yahan koi mujhe dad-e-kalam kya deta

Source: Book : Kitab-e-Rafta (Pg. 241) Author : Firasat Rizvi Publication : Academy Bazyaft, Karachi Pakistan Lahore (2007) Edition : 2007