Subscribe to our newsletter and get our newest updates

Yasin Ali Khan Markaz

  • Ghazal


aashiqi ke aashkare ho chuke


āshiqī ke āshkāre ho chuke
husn-e-yaktā ke pukāre ho chuke

uTh gayā parda jo fī-mābain thā
mann-o-tū ke the ishāre ho chuke

hai bahār-e-gulshan-e-duniyā do roz
bulbul-o-gul ke nazāre ho chuke

chal diye uTh kar jahāñ chāhe vahāñ
ek rañgī ke sahāre ho chuke

yaas se kah deñge vaqt-e-qatl ham
ham to ai pyāre tumhāre ho chuke

vāsil-e-dariyā jo qatra ho gayā
ġhairiyat ke the pukāre ho chuke

gulshan-e-hastī meñ dekhī thī bahār
auj par jo the sitāre ho chuke

varta-e-dariyā kā ġham jaatā rahā
ġhota khāte the kināre ho chuke

nek-o-bad se tum ko 'markaz' kyā ġharaz
duur dushman the tumhāre ho chuke

aashiqi ke aashkare ho chuke
husn-e-yakta ke pukare ho chuke

uTh gaya parda jo fi-mabain tha
mann-o-tu ke the ishaare ho chuke

hai bahaar-e-gulshan-e-duniya do roz
bulbul-o-gul ke nazare ho chuke

chal diye uTh kar jahan chahe wahan
ek rangi ke sahaare ho chuke

yas se kah denge waqt-e-qatl hum
hum to ai pyare tumhaare ho chuke

wasil-e-dariya jo qatra ho gaya
ghairiyat ke the pukare ho chuke

gulshan-e-hasti mein dekhi thi bahaar
auj par jo the sitare ho chuke

warta-e-dariya ka gham jata raha
ghota khate the kinare ho chuke

nek-o-bad se tum ko 'markaz' kya gharaz
dur dushman the tumhaare ho chuke


Source: Dewan-e-Markaz

Leave a comment

+