Subscribe to our newsletter and get our newest updates

Farasat Rizwi

  • Ghazal


khel tha apni ana ka ishq use samjha kiya


khel thā apnī anā kā ishq use samjhā kiyā
maiñ ne apne aap se kitnā baḌā dhokā kiyā

umr-bhar kā ham-nafas ik pal meñ ruḳhsat ho gayā
aur maiñ ḳhāmosh use jaate hue dekhā kiyā

ik zarā sī baat par rūThā rahā vo der tak
muskurā ke ḳhud hī phir merī taraf chehrā kiyā

fikr kī lazzat ke baa.is haiñ mirī nākāmiyāñ
sab amal karte rahe aur maiñ faqat sochā kiyā

zaḳhm kī ik aag thī jis se suḳhan raushan rakhā
dard kī ik lahar thī maiñ ne jise naġhma kiyā

sab hī kuchh us se na kahnā thā jo tere dil meñ thā
shiddat-e-iz.hār meñ tū ne 'farāsat' kyā kiyā

khel tha apni ana ka ishq use samjha kiya
main ne apne aap se kitna baDa dhoka kiya

umr-bhar ka ham-nafas ek pal mein ruKHsat ho gaya
aur main KHamosh use jate hue dekha kiya

ek zara si baat par ruTha raha wo der tak
muskura ke KHud hi phir meri taraf chehra kiya

fikr ki lazzat ke bais hain meri nakaamiyan
sab amal karte rahe aur main faqat socha kiya

zaKHm ki ek aag thi jis se suKHan raushan rakha
dard ki ek lahar thi main ne jise naghma kiya

sab hi kuchh us se na kahna tha jo tere dil mein tha
shiddat-e-izhaar mein tu ne 'farasat' kya kiya


Source: Book : Kitab-e-Rafta (Pg. 200) Author : Firasat Rizvi Publication : Academy Bazyaft, Karachi Pakistan Lahore (2007) Edition : 2007

Leave a comment

+