zabt-e-ġham mushkil hai aur mushkil hai mushkil kā javāb
nāseh-e-mushfiq tire bas kā nahīñ dil kā javāb

aa.ine meñ dekhte haiñ husn-e-kāmil kā javāb
koī pūchhe kyā vo deñge jazba-e-dil kā javāb

alvidā.a kah kar jo dete haiñ mire dil kā javāb
aa paḌī mushkil ki kyā ho aisī mushkil kā javāb

ḳhāk-e-parvāna ho shāyad zabt-e-kāmil kā javāb
sham.a ho saktī hai kab mere bujhe dil kā javāb

ai mire jazb-e-mohabbat terī ye be-tābiyāñ
aur ḳhamoshī hī ḳhamoshī jān-e-mahfil kā javāb

ik savāl-e-shauq par us ne hameñ ghāyal kiyā
hashr ke din dekhnā hai kyā ho qātil kā javāb

naġhmagī inkār kī bhī hai surūr-afzā magar
ab kahāñ hai lan-tarānī husn-e-kāmil kā javāb

un se āñkheñ chaar kar ke 'tāj' maiñ khoyā gayā
ik bharī mahfil meñ be-ḳhud kar gayā dil kā javāb

zabt-e-gham mushkil hai aur mushkil hai mushkil ka jawab
naseh-e-mushfiq tere bas ka nahin dil ka jawab

aaine mein dekhte hain husn-e-kaamil ka jawab
koi puchhe kya wo denge jazba-e-dil ka jawab

alwidaa kah kar jo dete hain mere dil ka jawab
aa paDi mushkil ki kya ho aisi mushkil ka jawab

KHak-e-parwana ho shayad zabt-e-kaamil ka jawab
shama ho sakti hai kab mere bujhe dil ka jawab

ai mere jazb-e-mohabbat teri ye be-tabiyan
aur KHamoshi hi KHamoshi jaan-e-mahfil ka jawab

ek sawal-e-shauq par us ne hamein ghayal kiya
hashr ke din dekhna hai kya ho qatil ka jawab

naghmagi inkar ki bhi hai surur-afza magar
ab kahan hai lan-tarani husn-e-kaamil ka jawab

un se aankhen chaar kar ke 'taj' main khoya gaya
ek bhari mahfil mein be-KHud kar gaya dil ka jawab