kaise manzar haiñ jo idrāk meñ aa jaate haiñ
jaise motī kisī poshāk meñ aa jaate haiñ

maiñ jhaTaktī huuñ sabhī zehn se ye vahm-o-gumāñ
phir bhī aksar ye mirī taak meñ aa jaate haiñ

jaisā bhejā hai mujhe aap ne paiġhām-e-vafā
aise naame to ka.ī Daak meñ aa jaate haiñ

apnī hastī pe gumāñ itnā na kiije sāhab
paikar-e-ḳhāk to phir ḳhaak meñ aa jaate haiñ

jin ko āñkhoñ meñ basāne kī ijāzat bhī nahīñ
vo tasavvur dil-e-bebāk meñ aa jaate haiñ

nahīñ hote haiñ jo chehre se ayaañ rañj-o-alam
vo sabhī sīna-e-sad-chāk meñ aa jaate haiñ

kaise manzar hain jo idrak mein aa jate hain
jaise moti kisi poshak mein aa jate hain

main jhaTakti hun sabhi zehn se ye wahm-o-guman
phir bhi aksar ye meri tak mein aa jate hain

jaisa bheja hai mujhe aap ne paigham-e-wafa
aise name to kai Dak mein aa jate hain

apni hasti pe guman itna na kije sahab
paikar-e-KHak to phir KHak mein aa jate hain

jin ko aankhon mein basane ki ijazat bhi nahin
wo tasawwur dil-e-bebak mein aa jate hain

nahin hote hain jo chehre se ayan ranj-o-alam
wo sabhi sina-e-sad-chaak mein aa jate hain

Source: Book : Koi bhi rut ho (Pg. 35) Author : Farah iqbal Publication : Alhamd Publications (2011) Edition : 2011