kabhī yaqīñ se huī aur kabhī gumāñ se huī
tire huzūr rasā.ī kahāñ kahāñ se huī

falak na māh-e-munavvar na kahkashāñ se huī
khulī jab aañkh mulāqāt ḳhāk-dāñ se huī

na falsafī na mufakkir na nukta-dāñ se huī
adā jo baat hamesha tirī zabāñ se huī

khulī na mujh pe bhī dīvāngī mirī barsoñ
mire junūn kī shohrat tire bayāñ se huī

jo tere naam se mansūb merā naam huā
to shahr bhar ko adāvat bhī merī jaañ se huī

sunā ke sab ko akelā hī ro rahā thā maiñ
kisī kī aañkh na tar merī dāstāñ se huī

jinheñ thā Dūbnā un ko bhī de diyā rasta
kabhī kabhī ye ḳhatā bahr-e-be-karāñ se huī

'farāġh' haath se kyā dāman-e-ḳhirad chhūTā
ki sar pe sañg kī bārish jahāñ-tahāñ se huī

kabhi yaqin se hui aur kabhi guman se hui
tere huzur rasai kahan kahan se hui

falak na mah-e-munawwar na kahkashan se hui
khuli jab aankh mulaqat KHak-dan se hui

na falsafi na mufakkir na nukta-dan se hui
ada jo baat hamesha teri zaban se hui

khuli na mujh pe bhi diwangi meri barson
mere junun ki shohrat tere bayan se hui

jo tere nam se mansub mera nam hua
to shahr bhar ko adawat bhi meri jaan se hui

suna ke sab ko akela hi ro raha tha main
kisi ki aankh na tar meri dastan se hui

jinhen tha Dubna un ko bhi de diya rasta
kabhi kabhi ye KHata bahr-e-be-karan se hui

'faragh' hath se kya daman-e-KHirad chhuTa
ki sar pe sang ki barish jahan-tahan se hui

Source: Book : Ghazal Ke Rang (Pg. 263) Author : Akram Naqqash, Sohil Akhtar Publication : Aflaak Publications, Gulbarga (2014) Edition : 2014