Subscribe to our newsletter and get our newest updates

Fani Badayuni

  • Ghazal


dair mein ya haram mein guzregi


dair meñ yā haram meñ guzregī
umr tere hī ġham meñ guzregī

kuchh umīd-e-karam meñ guzrī umr
kuchh umīd-e-karam meñ guzregī

zindagī yād-e-dost hai yaanī
zindagī hai to ġham meñ guzregī

ab karam kā ye mā-hasal hai ki umr
yād-e-ahd-e-sitam meñ guzregī

dil ko shauq-e-nashāt-e-vasl na chheḌ
ġham meñ guzrī hai ġham meñ guzregī

hasrat-e-dam-ba-dam meñ guzrī umr
ibrat-e-dam-ba-dam meñ guzregī

hashr kahte haiñ jis ko ai 'fānī'
vo ghaḌī sharah-e-ġham meñ guzregī

dair mein ya haram mein guzregi
umr tere hi gham mein guzregi

kuchh umid-e-karam mein guzri umr
kuchh umid-e-karam mein guzregi

zindagi yaad-e-dost hai yani
zindagi hai to gham mein guzregi

ab karam ka ye ma-hasal hai ki umr
yaad-e-ahd-e-sitam mein guzregi

dil ko shauq-e-nashat-e-wasl na chheD
gham mein guzri hai gham mein guzregi

hasrat-e-dam-ba-dam mein guzri umr
ibrat-e-dam-ba-dam mein guzregi

hashr kahte hain jis ko ai 'fani'
wo ghaDi sharah-e-gham mein guzregi


Leave a comment

+