Subscribe to our newsletter and get our newest updates

Fani Badayuni

  • Ghazal


hum maut bhi aae to masrur nahin hote


ham maut bhī aa.e to masrūr nahīñ hote
majbūr-e-ġham itne bhī majbūr nahīñ hote

dil hī meñ nahīñ rahte āñkhoñ meñ bhī rahte ho
tum duur bhī rahte ho to duur nahīñ hote

paḌtī haiñ abhī dil par sharmā.ī huī nazreñ
jo vaar vo karte haiñ bharpūr nahīñ hote

ummīd ke vādoñ se jī kuchh to bahaltā thā
ab ye bhī tire ġham ko manzūr nahīñ hote

arbāb-e-mohabbat par tum zulm ke baanī ho
ye varna mohabbat ke dastūr nahīñ hote

kaunain pe bhārī hai allāh re ġhurūr un kā
itne bhī adā vaale maġhrūr nahīñ hote

hai ishq tirā 'fānī' tash.hīr bhī shohrat bhī
rusvā-e-mohabbat yuuñ mash.hūr nahīñ hote

hum maut bhi aae to masrur nahin hote
majbur-e-gham itne bhi majbur nahin hote

dil hi mein nahin rahte aankhon mein bhi rahte ho
tum dur bhi rahte ho to dur nahin hote

paDti hain abhi dil par sharmai hui nazren
jo war wo karte hain bharpur nahin hote

ummid ke wadon se ji kuchh to bahalta tha
ab ye bhi tere gham ko manzur nahin hote

arbab-e-mohabbat par tum zulm ke bani ho
ye warna mohabbat ke dastur nahin hote

kaunain pe bhaari hai allah re ghurur un ka
itne bhi ada wale maghrur nahin hote

hai ishq tera 'fani' tashhir bhi shohrat bhi
ruswa-e-mohabbat yun mashhur nahin hote

RECITATIONS Nomaan Shauque



00:00/00:00 hum maut bhi aae to masrur nahin hote Nomaan Shauque

Leave a comment

+