Subscribe to our newsletter and get our newest updates

Fana Nizami Kanpuri

  • Ghazal


yun intiqam tujhse fasl-e-bahaar lenge


yuuñ intiqām tujh se fasl-e-bahār leñge
phūloñ ke sāmne ham kāñToñ ke pyaar leñge

jaane do ham ko tanhā tūfān-e-ārzū meñ
jab Dūbne lageñge tum ko pukār leñge

jo kuchh thā paas apne duniyā ne le liyā hai
ik jaan rah ga.ī hai vo ġham-gusār leñge

is daur-e-tishnagī meñ kyā mai-kade ko chhoḌeñ
kuchh din guzar ga.e haiñ kuchh din guzār leñge

sayyād o bāġhbāñ ke tevar batā rahe haiñ
ye log fasl-e-gul ke kapḌe utaar leñge

yun intiqam tujh se fasl-e-bahaar lenge
phulon ke samne hum kanTon ke pyar lenge

jaane do hum ko tanha tufan-e-arzu mein
jab Dubne lagenge tum ko pukar lenge

jo kuchh tha pas apne duniya ne le liya hai
ek jaan rah gai hai wo gham-gusar lenge

is daur-e-tishnagi mein kya mai-kade ko chhoDen
kuchh din guzar gae hain kuchh din guzar lenge

sayyaad o baghban ke tewar bata rahe hain
ye log fasl-e-gul ke kapDe utar lenge


Leave a comment

+