Subscribe to our newsletter and get our newest updates

Fana bulandshahri

  • Ghazal


jab tak mere honTon pe tera nam rahega


jab tak mire hoñToñ pe tirā naam rahegā
dil be-ḳhabar-e-gardish-e-ayyām rahegā

miT jā.egā har naqsh-e-ḳhayāl-e-ġham-e-hastī
lekin varaq-e-dil pe tirā naam rahegā

kyuuñ Dar hai gunāhoñ ke sabab hashr ke din se
ham jānte haiñ un kā karam aam rahegā

paiġhām to ā.eñge bahut dair-o-haram se
lekin tirī chaukhaT se mujhe kaam rahegā

mai-ḳhāna salāmat hai agar terī nazar kā
labrez ma-e-ishq se har jaam rahegā

dāman hai agar terā mire dast-e-talab meñ
āġhāz se behtar mirā anjām rahegā

jā.egī na dil se tire aariz kī mohabbat
zulfoñ kā tasavvur mujhe har shaam rahegā

āñkheñ hī nahīñ terī 'fanā' diid ke qābil
tū jalva-gah-e-yār meñ nākām rahegā

jab tak mere honTon pe tera nam rahega
dil be-KHabar-e-gardish-e-ayyam rahega

miT jaega har naqsh-e-KHayal-e-gham-e-hasti
lekin waraq-e-dil pe tera nam rahega

kyun Dar hai gunahon ke sabab hashr ke din se
hum jaante hain un ka karam aam rahega

paigham to aaenge bahut dair-o-haram se
lekin teri chaukhaT se mujhe kaam rahega

mai-KHana salamat hai agar teri nazar ka
labrez ma-e-ishq se har jam rahega

daman hai agar tera mere dast-e-talab mein
aaghaz se behtar mera anjam rahega

jaegi na dil se tere aariz ki mohabbat
zulfon ka tasawwur mujhe har sham rahega

aankhen hi nahin teri 'fana' did ke qabil
tu jalwa-gah-e-yar mein nakaam rahega


Leave a comment

+