haram hai kyā chiiz dair kyā hai kisī pe merī nazar nahīñ hai
maiñ tere jalvoñ meñ kho gayā huuñ mujhe ab apnī ḳhabar nahīñ hai

jinheñ hai Dar rāh-e-imtihāñ se unheñ abhī ye ḳhabar nahīñ hai
agar karam un kā rāhbar ho kaThin koī rahguzar nahīñ hai

ba-shauq-e-sajda chale haiñ lekin ajiib maslak hai āshiqoñ kā
vahāñ ibādat harām Thahrī jahāñ tirā sañg-e-dar nahīñ hai

tirī talab terī aarzū meñ nahīñ mujhe hosh zindagī kā
jhukā huuñ yuuñ tere āstāñ par ki mujh ko ehsās-e-sar nahīñ hai

tirī navāzish mirī masarrat mirī tabāhī jalāl terā
kahīñ nahīñ hai mirā Thikāna jo terī sīdhī nazar nahīñ hai

jahāñ bhī hai koī miTne vaalā tirī ināyat ke saa.e meñ hai
banā liyā jis ko tū ne apnā jahāñ meñ vo dar-ba-dar nahīñ hai

har ik jagah tū hī jalva-gar hai vo but-kada ho yā tūr-e-sīnā
nigāh-e-duniyā hai kor bātin tirī tajallī kidhar nahīñ hai

yahīñ pe jiinā yahīñ pe marnā yahīñ hai duniyā yahīñ hai uqbā
'fanā' dar-e-yār ke alāva kahīñ hamārā guzar nahīñ hai

haram hai kya chiz dair kya hai kisi pe meri nazar nahin hai
main tere jalwon mein kho gaya hun mujhe ab apni KHabar nahin hai

jinhen hai Dar rah-e-imtihan se unhen abhi ye KHabar nahin hai
agar karam un ka rahbar ho kaThin koi rahguzar nahin hai

ba-shauq-e-sajda chale hain lekin ajib maslak hai aashiqon ka
wahan ibaadat haram Thahri jahan tera sang-e-dar nahin hai

teri talab teri aarzu mein nahin mujhe hosh zindagi ka
jhuka hun yun tere aastan par ki mujh ko ehsas-e-sar nahin hai

teri nawazish meri masarrat meri tabahi jalal tera
kahin nahin hai mera Thikana jo teri sidhi nazar nahin hai

jahan bhi hai koi miTne wala teri inayat ke sae mein hai
bana liya jis ko tu ne apna jahan mein wo dar-ba-dar nahin hai

har ek jagah tu hi jalwa-gar hai wo but-kada ho ya tur-e-sina
nigah-e-duniya hai kor baatin teri tajalli kidhar nahin hai

yahin pe jina yahin pe marna yahin hai duniya yahin hai uqba
'fana' dar-e-yar ke alawa kahin hamara guzar nahin hai