vo aur hoñge jin ko haram kī talāsh hai
mujh ko to tere naqsh-e-qadam kī talāsh hai

maiñ to gunāhgār-e-mohabbat huuñ ai sanam
mujh ko tirī nigāh-e-karam kī talāsh hai

zāhid sanam-kada merī manzil nahīñ magar
āshiq huuñ mujh ko apne sanam kī talāsh hai

maiñ terā ho chukā huuñ zamāne se kyā ġharaz
ai jān-e-jāñ mujhe tire ġham kī talāsh hai

zāhid talāsh kartā huuñ apne sanam ko maiñ
tujh ko sanam ke badle iram kī talāsh hai

le kar haram meñ shaiḳh gayā diin kī talab
panDit ko but-kade meñ dharam kī talāsh hai

ham āshiqoñ kā kyā hai ye marzī hai yaar kī
un kā sitam mile to sitam kī talāsh hai

merā dharam yahī hai ki mil jaa.e tū mujhe
terī hī justujū meñ haram kī talāsh hai

maiñ to 'fanā' huuñ ishq meñ ai jaan kyā kaheñ
tum jo atā karo usī ġham kī talāsh hai

wo aur honge jin ko haram ki talash hai
mujh ko to tere naqsh-e-qadam ki talash hai

main to gunahgar-e-mohabbat hun ai sanam
mujh ko teri nigah-e-karam ki talash hai

zahid sanam-kada meri manzil nahin magar
aashiq hun mujh ko apne sanam ki talash hai

main tera ho chuka hun zamane se kya gharaz
ai jaan-e-jaan mujhe tere gham ki talash hai

zahid talash karta hun apne sanam ko main
tujh ko sanam ke badle iram ki talash hai

le kar haram mein shaiKH gaya din ki talab
panDit ko but-kade mein dharam ki talash hai

hum aashiqon ka kya hai ye marzi hai yar ki
un ka sitam mile to sitam ki talash hai

mera dharam yahi hai ki mil jae tu mujhe
teri hi justuju mein haram ki talash hai

main to 'fana' hun ishq mein ai jaan kya kahen
tum jo ata karo usi gham ki talash hai