Subscribe to our newsletter and get our newest updates

Fana bulandshahri

  • Ghazal


andhere lakh chha jaen ujala kam nahin hota


añdhere laakh chhā jaa.eñ ujālā kam nahīñ hotā
charāġh-e-ārzū jal kar kabhī maddham nahīñ hotā

masīhā vo na hoñ to dard-e-ulfat kam nahīñ hotā
ye zaḳhm-e-ishq hai is zaḳhm kā marham nahīñ hotā

ġham-e-jānāñ ko jān-e-jāñ banā le dekh dīvāne
ġham-e-jānāñ se baḌh kar aur koī ġham nahīñ hotā

talab ban kar mirī har dam vo mere saath rahte haiñ
kabhī tanhā mirī tanhā.ī kā aalam nahīñ hotā

tumhārā āstāna chhoḌ kar āḳhir kahāñ jā.ūñ
diyā hai dard-e-dil tum ne vo dil se kam nahīñ hotā

mirā tan-man jalā kar tū ne zālim ḳhaak kar Daalā
magar ai soz-e-ulfat terā sho.ala kam nahīñ hotā

tere dar se mujhe itnī mohabbat ho ga.ī jānāñ
tire dar ke alāva sar kahīñ bhī ḳham nahīñ hotā

badaltī hī nahīñ qismat mohabbat karne vāloñ kī
tasavvur yaar kā jab tak 'fanā' paiham nahīñ hotā

samajh liije ki jazb-e-dil meñ hai koī kamī baaqī
agar dīdār un kā ishq meñ har dam nahīñ hotā

andhere lakh chha jaen ujala kam nahin hota
charagh-e-arzu jal kar kabhi maddham nahin hota

masiha wo na hon to dard-e-ulfat kam nahin hota
ye zaKHm-e-ishq hai is zaKHm ka marham nahin hota

gham-e-jaanan ko jaan-e-jaan bana le dekh diwane
gham-e-jaanan se baDh kar aur koi gham nahin hota

talab ban kar meri har dam wo mere sath rahte hain
kabhi tanha meri tanhai ka aalam nahin hota

tumhaara aastana chhoD kar aaKHir kahan jaun
diya hai dard-e-dil tum ne wo dil se kam nahin hota

mera tan-man jala kar tu ne zalim KHak kar Dala
magar ai soz-e-ulfat tera shoala kam nahin hota

tere dar se mujhe itni mohabbat ho gai jaanan
tere dar ke alawa sar kahin bhi KHam nahin hota

badalti hi nahin qismat mohabbat karne walon ki
tasawwur yar ka jab tak 'fana' paiham nahin hota

samajh lije ki jazb-e-dil mein hai koi kami baqi
agar didar un ka ishq mein har dam nahin hota


Leave a comment

+