dil butoñ pe nisār karte haiñ
kufr ko pā.edār karte haiñ

jin kā maz.hab sanam-parastī ho
kāfirī iḳhtiyār karte haiñ

us kā īmān lūTte haiñ sanam
jis ko apnā shikār karte haiñ

hausla merā āzmāne ko
vo sitam baar baar karte haiñ

is se baḌh kar nahīñ namāz koī
apnī hastī se pyaar karte haiñ

ai 'fanā' dil sambhāl kar rakhnā
but nigāhoñ se vaar karte haiñ

dil buton pe nisar karte hain
kufr ko paedar karte hain

jin ka mazhab sanam-parasti ho
kafiri iKHtiyar karte hain

us ka iman luTte hain sanam
jis ko apna shikar karte hain

hausla mera aazmane ko
wo sitam bar bar karte hain

is se baDh kar nahin namaz koi
apni hasti se pyar karte hain

ai 'fana' dil sambhaal kar rakhna
but nigahon se war karte hain