Subscribe to our newsletter and get our newest updates

Fakhr Zaman

  • Ghazal


lamhon ka bhanwar chir ke insan bana hun


lamhoñ kā bhañvar chiir ke insān banā huuñ
ehsās huuñ maiñ vaqt ke siine meñ gaḌā huuñ

kahne ko to har mulk meñ ghūmā huuñ phirā huuñ
sochūñ to jahāñ thā vahīñ chup-chāp khaḌā huuñ

fōt-pāth pe arse se paḌā soch rahā huuñ
pattā to maiñ sarsabz thā kyuuñ TuuT girā huuñ

ik roz zar-o-sīm ke ambār bhī the hech
bikne pe jo aayā huuñ to kauḌī pe bikā huuñ

shāyad ki kabhī mujh pe bhī hiire kā gumāñ ho
dekho to maiñ patthar huuñ magar soch rahā huuñ

hālāt kā dhārā kabhī aise bhī rukā hai
nādāñ huuñ ki maiñ ret ke band bāñdh rahā huuñ

ik ret kī dīvār kī sūrat the sab ādarsh
jin ke liye ik umr maiñ duniyā se laḌā huuñ

ahbāb kī nazroñ meñ huuñ gar vājib-e-tāzīm
kyuuñ apnī nigāhoñ meñ burī tarah girā huuñ

ai 'faḳhr' garajkā mirī fitrat sahī lekin
jo ġhair kī marzī se hī barse vo ghaTā huuñ

lamhon ka bhanwar chir ke insan bana hun
ehsas hun main waqt ke sine mein gaDa hun

kahne ko to har mulk mein ghuma hun phira hun
sochun to jahan tha wahin chup-chap khaDa hun

foot-path pe arse se paDa soch raha hun
patta to main sarsabz tha kyun TuT gira hun

ek roz zar-o-sim ke ambar bhi the hech
bikne pe jo aaya hun to kauDi pe bika hun

shayad ki kabhi mujh pe bhi hire ka guman ho
dekho to main patthar hun magar soch raha hun

haalat ka dhaara kabhi aise bhi ruka hai
nadan hun ki main ret ke band bandh raha hun

ek ret ki diwar ki surat the sab aadarsh
jin ke liye ek umr main duniya se laDa hun

ahbab ki nazron mein hun gar wajib-e-tazim
kyun apni nigahon mein buri tarah gira hun

ai 'faKHr' garajka meri fitrat sahi lekin
jo ghair ki marzi se hi barse wo ghaTa hun


Source: Funoon(Jadeed Ghazal Number: Volume-002)

Leave a comment

+