Subscribe to our newsletter and get our newest updates

Faizi Nizam Puri

  • Ghazal


gham-e-jaanan ke siwa kuchh hamein pyara na hua


ġham-e-jānāñ ke sivā kuchh hameñ pyārā na huā
ham kisī ke na hue koī hamārā na huā

kyā usī kā hai vafā nām-e-mohabbat hai yahī
mehrbāñ ham pe kabhī vo sitam-ārā na huā

laakh tūfān-e-havādis ne qadam thaam liye
merī ġhairat ko palaTnā bhī gavārā na huā

dil vahī dil hai haqīqat kī nazar meñ ai dil
sard jis dil meñ mohabbat kā sharārā na huā

DhūñDhtā aa.egā kal ahl-e-mohabbat ko yahī
ġham nahīñ aaj zamāna jo hamārā na huā

ahl-e-duniyā ne masarrat hī masarrat chāhī
ham ko is ġham ke sivā kuchh bhī gavārā na huā

jaan dī hai dil-e-ḳhuddār ne kis mushkil se
aaj bālīñ pe vo ḳhud-bīn-o-ḳhud-ārā na huā

aañkh sū-e-haram-o-dair kabhī uTh jaatī
ishq kī raah meñ ye bhī to gavārā na huā

ḳhaak chhānī chaman-o-dasht kī barsoñ 'faizī'
aah taskīn-e-nazar koī nazārā na huā

gham-e-jaanan ke siwa kuchh hamein pyara na hua
hum kisi ke na hue koi hamara na hua

kya usi ka hai wafa nam-e-mohabbat hai yahi
mehrban hum pe kabhi wo sitam-ara na hua

lakh tufan-e-hawadis ne qadam tham liye
meri ghairat ko palaTna bhi gawara na hua

dil wahi dil hai haqiqat ki nazar mein ai dil
sard jis dil mein mohabbat ka sharara na hua

DhunDhta aaega kal ahl-e-mohabbat ko yahi
gham nahin aaj zamana jo hamara na hua

ahl-e-duniya ne masarrat hi masarrat chahi
hum ko is gham ke siwa kuchh bhi gawara na hua

jaan di hai dil-e-KHuddar ne kis mushkil se
aaj baalin pe wo KHud-bin-o-KHud-ara na hua

aankh su-e-haram-o-dair kabhi uTh jati
ishq ki rah mein ye bhi to gawara na hua

KHak chhani chaman-o-dasht ki barson 'faizi'
aah taskin-e-nazar koi nazara na hua


Source: Mizrab

Leave a comment

+