Subscribe to our newsletter and get our newest updates

Faiz rahil Khan

  • Ghazal


tum dariya sa ashk bahao to jaanen


tum dariyā sā ashk bahāo to jāneñ
kyā guzrī hai baat batāo to jāneñ

daadā kī pahchān batānā āsāñ hai
apne dam par naam kamāo to jāneñ

bastī meñ tum ḳhuub siyāsat karte ho
bastī kī āvāz uThāo to jāneñ

bachchoñ jaisā ashk bahā kar aa.e ho
tum āshiq ho dard chhupāo to jāneñ

jism sajā kar baiTh ga.e ho kyā samjhūñ
palkoñ par kuchh ḳhvāb sajāo to jāneñ

thoḌā pī kar taaj uThāte phirte ho
mai-ḳhānoñ meñ raat batāo to jāneñ

kyuuñ kyā kaise 'faiz' yahī to kartā hai
tum shā.ir ho sher sunāo to jāneñ

tum dariya sa ashk bahao to jaanen
kya guzri hai baat batao to jaanen

dada ki pahchan batana aasan hai
apne dam par nam kamao to jaanen

basti mein tum KHub siyasat karte ho
basti ki aawaz uThao to jaanen

bachchon jaisa ashk baha kar aae ho
tum aashiq ho dard chhupao to jaanen

jism saja kar baiTh gae ho kya samjhun
palkon par kuchh KHwab sajao to jaanen

thoDa pi kar taj uThate phirte ho
mai-KHanon mein raat batao to jaanen

kyun kya kaise 'faiz' yahi to karta hai
tum shair ho sher sunao to jaanen


Leave a comment

+