yuuñ pahuñchnā hai mujhe ruuh kī tuġhyānī tak
jis tarah rassī se jaatā hai ghaḌā paanī tak

kāTnī paḌtī hai nāḳhun se takan kī zanjīr
yuuñ hī aatī nahīñ mushkil koī āsānī tak

zindagī tujh se banā.e hue rishte kī havas
mujh ko le aa.ī hai duniyā kī pareshānī tak

aise jarrāhoñ kā qabza hai suḳhan par afsos
kar nahīñ sakte jo lafzoñ kī musalmānī tak

apne andar maiñ kiyā kartā huuñ raajā kī talāsh
is vasīle se pahuñchnā hai mujhe raanī tak

aise lafzoñ ko bhī be-aib banāyā ham ne
jin kī jaa.ez hī nahīñ hotī thī qurbānī tak

husn kā paañv dabātī hai jahāñ shoḳh havā
ishq le aayā hai mujh ko isī vīrānī tak

'faiz' ham log haiñ ik aisī kachehrī ke vakīl
faujdārī se pahuñchte haiñ jo dīvānī tak

yun pahunchna hai mujhe ruh ki tughyani tak
jis tarah rassi se jata hai ghaDa pani tak

kaTni paDti hai naKHun se takan ki zanjir
yun hi aati nahin mushkil koi aasani tak

zindagi tujh se banae hue rishte ki hawas
mujh ko le aai hai duniya ki pareshani tak

aise jarrahon ka qabza hai suKHan par afsos
kar nahin sakte jo lafzon ki musalmani tak

apne andar main kiya karta hun raja ki talash
is wasile se pahunchna hai mujhe rani tak

aise lafzon ko bhi be-aib banaya hum ne
jin ki jaez hi nahin hoti thi qurbani tak

husn ka panw dabaati hai jahan shoKH hawa
ishq le aaya hai mujh ko isi virani tak

'faiz' hum log hain ek aisi kachehri ke wakil
faujdari se pahunchte hain jo diwani tak