usī se fikr-o-fan ko har ghaḌī mansūb rakhte haiñ
ġhazal vaale ġhazal ko sūrat-e-mahbūb rakhte haiñ

zabāñ kī chāshnī se tar-ba-tar ġhazloñ ko paḌhtā huuñ
ye rūhānī ġhizā hai ham jise marġhūb rakhte haiñ

ġhazal tahzīb hai merī ġhazal merā tamaddun hai
buzurgoñ ne jo rakkhā thā vahī uslūb rakhte haiñ

sunāte haiñ tahat meñ jab ġhazal andāz meñ apne
pukār uThtī hai duniyā zauq ham kyā ḳhuub rakhte haiñ

ġhazal bas is liye phailā rahī hai apne dāman ko
ki ham ġhazloñ ke tevar ko bahut hī ḳhuub rakhte haiñ

jinheñ ġhazloñ se uljhan hai miyāñ 'fayyāz' kyā boleñ
nazākat se ġhazal kī ham unheñ mar.ūb rakhte haiñ

usi se fikr-o-fan ko har ghaDi mansub rakhte hain
ghazal wale ghazal ko surat-e-mahbub rakhte hain

zaban ki chashni se tar-ba-tar ghazlon ko paDhta hun
ye ruhani ghiza hai hum jise marghub rakhte hain

ghazal tahzib hai meri ghazal mera tamaddun hai
buzurgon ne jo rakkha tha wahi uslub rakhte hain

sunate hain tahat mein jab ghazal andaz mein apne
pukar uThti hai duniya zauq hum kya KHub rakhte hain

ghazal bas is liye phaila rahi hai apne daman ko
ki hum ghazlon ke tewar ko bahut hi KHub rakhte hain

jinhen ghazlon se uljhan hai miyan 'fayyaz' kya bolen
nazakat se ghazal ki hum unhen marub rakhte hain

Source: Book : Fasl-e-khayaal (Pg. 27) Author : Faiyaz Rashk Publication : Arshia Publications (2016) Edition : 2016