go tār-e-ankabūt aayā nahīñ ab tak gumānoñ meñ
magar kuchh makḌiyoñ kī sarsarāhaT sī hai kānoñ meñ

zamīñ-zādoñ ko ab miTTī se to vābasta rahne do
ḳhudārā fasl-e-nau kā zauq rahne do kisānoñ meñ

saroñ se āsmāñ bhī kyā haTāyā jaane vaalā hai
shabīheñ mehr-o-mah kī Tāñkte ho kyoñ makānoñ meñ

zarā Thahro ugegī bhuuk bhī kāġhaz ke peḌoñ par
abhī to haath bāñTe jā rahe haiñ bāġhbānoñ meñ

bahut mumkin hai patthar ke zamāne ke nazar aao
agar paidā kiyā jaa.e tumheñ pichhle zamānoñ meñ

na panje haiñ na par haiñ aur na hai parvāz kī tāqat
jo naġhma-sañj honā ho to luknat hai zabānoñ meñ

chalā aatā hai bastī meñ liye zambīl fatvoñ kī
tū aisā kar baserā kar pahāḌoñ kī chaTānoñ meñ

go tar-e-ankabut aaya nahin ab tak gumanon mein
magar kuchh makDiyon ki sarsarahaT si hai kanon mein

zamin-zadon ko ab miTTi se to wabasta rahne do
KHudara fasl-e-nau ka zauq rahne do kisanon mein

saron se aasman bhi kya haTaya jaane wala hai
shabihen mehr-o-mah ki Tankte ho kyon makanon mein

zara Thahro ugegi bhuk bhi kaghaz ke peDon par
abhi to hath banTe ja rahe hain baghbanon mein

bahut mumkin hai patthar ke zamane ke nazar aao
agar paida kiya jae tumhein pichhle zamanon mein

na panje hain na par hain aur na hai parwaz ki taqat
jo naghma-sanj hona ho to luknat hai zabanon mein

chala aata hai basti mein liye zambil fatwon ki
tu aisa kar basera kar pahaDon ki chaTanon mein