dil ke qirtās pe ik lafz mohabbat likhnā
jo kabhī ishq meñ kī thī vo riyāzat likhnā

likhne baiTho jo kabhī dil kī hikāyat koī
naam us meñ mirā tum hasb-e-rivāyat likhnā

pañkhuḌī phuul kī lab aañkh hai gahrā sāgar
abrū haiñ teġh se aur chaal qayāmat likhnā

bhūlne vaale agar yaad kabhī aa jā.ūñ
bhīgī palkoñ se faqat ashk-e-nadāmat likhnā

vaise aḳhlāq kī do chaar kitābeñ paḌh kar
ham ko aatā hī nahīñ harf-e-siyāsat likhnā

tire hāthoñ ko jo mālik ne qalam sauñpā hai
jhuuT ko jhuuT sadāqat ko sadāqat likhnā

tum jinheñ kahte ho kāfar unheñ aa kar dekho
kaise karte haiñ ye insān kī ḳhidmat likhnā

ai ġham-e-ishq mire paañv ke chhāle gin kar
dasht-e-ulfat kī ye majbūr masāfat likhnā

yaad hai pahlī mohabbat kī ḳhumārī ab tak
vo daraḳhtoñ pe tirā naam 'masarrat' likhnā

dil ke qirtas pe ek lafz mohabbat likhna
jo kabhi ishq mein ki thi wo riyazat likhna

likhne baiTho jo kabhi dil ki hikayat koi
nam us mein mera tum hasb-e-riwayat likhna

pankhuDi phul ki lab aankh hai gahra sagar
abru hain tegh se aur chaal qayamat likhna

bhulne wale agar yaad kabhi aa jaun
bhigi palkon se faqat ashk-e-nadamat likhna

waise aKHlaq ki do chaar kitaben paDh kar
hum ko aata hi nahin harf-e-siyasat likhna

tere hathon ko jo malik ne qalam saunpa hai
jhuT ko jhuT sadaqat ko sadaqat likhna

tum jinhen kahte ho kafar unhen aa kar dekho
kaise karte hain ye insan ki KHidmat likhna

ai gham-e-ishq mere panw ke chhaale gin kar
dasht-e-ulfat ki ye majbur masafat likhna

yaad hai pahli mohabbat ki KHumari ab tak
wo daraKHton pe tera nam 'masarrat' likhna