chāhtī hai āḳhir kyā āgahī ḳhudā-ma.alūm
kitne rañg badlegī zindagī ḳhudā-ma.alūm

kal to ḳhair ai rahbar tere saath rahrav the
aaj kis pe hañstī hai gumrahī ḳhudā-ma.alūm

ab bhī sub.h hotī hai ab bhī din nikaltā hai
jā chhipī kahāñ lekin raushnī ḳhudā-ma.alūm

rāstī gurezāñ hai āshtī hirāsāñ hai
kis se kis se uljhegā aadmī ḳhudā-ma.alūm

ab to vaqt aayā hai Duub kar ubharne kā
kitnī kashtiyāñ Dūbīñ aur abhī ḳhudā-ma.alūm

zauq-e-naġhma-e-pairā.ī tū hī baḌh ke de āvāz
kab se ġharq-e-hairat hai ḳhāmushī ḳhudā-ma.alūm

sirf bhiik māñgī thī ham ne ādamiyat kī
kyuuñ biphar ga.e 'yāqūb' mudda.ī ḳhudā-ma.alūm

chahti hai aaKHir kya aagahi KHuda-malum
kitne rang badlegi zindagi KHuda-malum

kal to KHair ai rahbar tere sath rahraw the
aaj kis pe hansti hai gumrahi KHuda-malum

ab bhi subh hoti hai ab bhi din nikalta hai
ja chhipi kahan lekin raushni KHuda-malum

rasti gurezan hai aashti hirasan hai
kis se kis se uljhega aadmi KHuda-malum

ab to waqt aaya hai Dub kar ubharne ka
kitni kashtiyan Dubin aur abhi KHuda-malum

zauq-e-naghma-e-pairai tu hi baDh ke de aawaz
kab se gharq-e-hairat hai KHamushi KHuda-malum

sirf bhik mangi thi hum ne aadamiyat ki
kyun biphar gae 'yaqub' muddai KHuda-malum

Source: Sang-e-meel