bande zamīn aur āsmāñ sarmā kī shab kahāniyāñ
sachchī haiñ ye rifāqateñ baaqī haiñ sab kahāniyāñ

ḳheme ukhaḌ ujaḌ ga.e aisī havā-e-shab chalī
kirneñ zamīñ pe likh ga.iiñ kaisī ajab kahāniyāñ

vus.at-e-dasht ke makīñ vaadī meñ kuuch kar ga.e
shāḳhoñ pe barf likh ga.ī naġhma-ba-lab kahāniyāñ

chāñd kī ḳhaak aa ga.ī pairoñ tale hayāt ke
aisī kaThin rivāyateñ aisī kaDhab kahāniyāñ

jauhar-e-haq nahīñ milā mujh ko kisī kitāb meñ
miTTī se sun rahā huuñ maiñ ālī-nasab kahāniyāñ

vus.at-e-koh-o-dasht ho shahr o nagar kā gasht ho
merā safar hikāyateñ merā adab kahāniyāñ

shahroñ ko kyā ḳhabar ki maiñ kaun huuñ kis fazā meñ huuñ
likhnī haiñ ek din mujhe sabr-talab kahāniyāñ

bande zamin aur aasman sarma ki shab kahaniyan
sachchi hain ye rifaqaten baqi hain sab kahaniyan

KHeme ukhaD ujaD gae aisi hawa-e-shab chali
kirnen zamin pe likh gain kaisi ajab kahaniyan

wusat-e-dasht ke makin wadi mein kuch kar gae
shaKHon pe barf likh gai naghma-ba-lab kahaniyan

chand ki KHak aa gai pairon tale hayat ke
aisi kaThin riwayaten aisi kaDhab kahaniyan

jauhar-e-haq nahin mila mujh ko kisi kitab mein
miTTi se sun raha hun main aali-nasab kahaniyan

wusat-e-koh-o-dasht ho shahr o nagar ka gasht ho
mera safar hikayaten mera adab kahaniyan

shahron ko kya KHabar ki main kaun hun kis faza mein hun
likhni hain ek din mujhe sabr-talab kahaniyan

Source: Book : meyaar (Pg. 293)