mujhe vo kunj-e-tanhā.ī se āḳhir kab nikālegā
akele-pan kā ye ehsās mujh ko maar Dālegā

kisī ko kyā paḌī hai merī ḳhātir ḳhud ko zahmat de
pareshāñ haiñ sabhī kaise koī mujh ko sambhālegā

abhī tārīḳh naamī ek jādūgar ko aanā hai
jo zinda shahr aur ajsām ko patthar meñ Dhālegā

bas agle moḌ par manzil tirī aane hī vaalī hai
mire ai ham-safar tū kitnā merā dukh baTā legā

sharīk-e-ranj kyā karnā use taklīf kyā denī
ki jitnī der baiThegā vahī bāteñ nikālegā

rihā kar de qafas kī qaid se ghāyal parinde ko
kisī ke dard ko is dil meñ kitne saal pālegā

mujhe wo kunj-e-tanhai se aaKHir kab nikalega
akele-pan ka ye ehsas mujh ko mar Dalega

kisi ko kya paDi hai meri KHatir KHud ko zahmat de
pareshan hain sabhi kaise koi mujh ko sambhaalega

abhi tariKH nami ek jadugar ko aana hai
jo zinda shahr aur ajsam ko patthar mein Dhaalega

bas agle moD par manzil teri aane hi wali hai
mere ai ham-safar tu kitna mera dukh baTa lega

sharik-e-ranj kya karna use taklif kya deni
ki jitni der baiThega wahi baaten nikalega

riha kar de qafas ki qaid se ghayal parinde ko
kisi ke dard ko is dil mein kitne sal palega

Videos
This video is playing from YouTube Videos
This video is playing from YouTube Unknown