diloñ meñ dard hī utnā kashīd rakkhā hai
ki aañkh aañkh ne aañsū kashīd rakkhā hai

qitāl zulm-o-tashaddud fasād aag dhuāñ
hamāre shahr meñ ab kyā mazīd rakkhā hai

na jis se hall-e-masā.il kī raah nikle koī
usī kā naam to guft-o-shunīd rakkhā hai

uḌī hai jab se parindoñ kī vāpsī kī ḳhabar
har ek shaḳhs ne piñjra ḳharīd rakkhā hai

batā rahe haiñ 'tasavvur' ye shahr ke hālāt
kisī kī pusht pe dast-e-yazīd rakkhā hai

dilon mein dard hi utna kashid rakkha hai
ki aankh aankh ne aansu kashid rakkha hai

qital zulm-o-tashaddud fasad aag dhuan
hamare shahr mein ab kya mazid rakkha hai

na jis se hall-e-masail ki rah nikle koi
usi ka nam to guft-o-shunid rakkha hai

uDi hai jab se parindon ki wapsi ki KHabar
har ek shaKHs ne pinjra KHarid rakkha hai

bata rahe hain 'tasawwur' ye shahr ke haalat
kisi ki pusht pe dast-e-yazid rakkha hai

Source: Book : Seepiyon Ki Qaid men Author : Yaqoob Tasawwur Publication : Yaqoob Tasawwur