Subscribe to our newsletter and get our newest updates

Ejaz Warsi

  • Ghazal


kar-e-KHair itna to ai laghzish-e-pa ho jata


kār-e-ḳhair itnā to ai laġhzish-e-pā ho jaatā
paa.e saaqī pe hī ik sajda adā ho jaatā

vo to ye kahiye ki majbūr hai nazm-e-hastī
varna har banda-e-maġhrūr ḳhudā ho jaatā

qāfile vaale the mahrūm-e-basīrat varna
merā har naqsh-e-qadam rāh-numā ho jaatā

ġham ke māroñ pe bhī ai dāvar-e-hashr ek nazar
aaj to faisla-e-ahal-e-vafā ho jaatā

yuuñ añdheroñ meñ bhaTakte na kabhī ahl-e-ḳhirad
koī dīvāna agar rāh-numā ho jaatā

dil tirī nīm-nigāhī kā to mamnūn sahī
dard abhī kam hai zarā aur sivā ho jaatā

lazzat-e-ġham se hai zid fitrat-e-ġham ko shāyad
dard hī dard na kyuuñ dard davā ho jaatā

sun ke bhar aatā agar un kā bhī dil ai 'ejāz'
qissa-e-dard kā unvān nayā ho jaatā

kar-e-KHair itna to ai laghzish-e-pa ho jata
pae saqi pe hi ek sajda ada ho jata

wo to ye kahiye ki majbur hai nazm-e-hasti
warna har banda-e-maghrur KHuda ho jata

qafile wale the mahrum-e-basirat warna
mera har naqsh-e-qadam rah-numa ho jata

gham ke maron pe bhi ai dawar-e-hashr ek nazar
aaj to faisla-e-ahal-e-wafa ho jata

yun andheron mein bhaTakte na kabhi ahl-e-KHirad
koi diwana agar rah-numa ho jata

dil teri nim-nigahi ka to mamnun sahi
dard abhi kam hai zara aur siwa ho jata

lazzat-e-gham se hai zid fitrat-e-gham ko shayad
dard hi dard na kyun dard dawa ho jata

sun ke bhar aata agar un ka bhi dil ai 'ejaz'
qissa-e-dard ka unwan naya ho jata


Source: Haft Rang(Bijnor Ke Muqami Shora ka Intikhab-e-kalam)

Leave a comment

+