musāfiroñ ke ye vahm-o-gumāñ meñ thā hī nahīñ
ki rāhbar to koī kārvāñ meñ thā hī nahīñ
savāl ye hai ki phir aag lag ga.ī kaise
koī diyā to añdhere makāñ meñ thā hī nahīñ
uThā liye ga.e hathiyār phir tahaffuz ko
ki shahr-e-amn meñ koī amaañ meñ thā hī nahīñ
to lāzima use aanā thā is zamīñ par hī
ki aadmī kā guzar āsmāñ meñ thā hī nahīñ
sunā.ī maiñ ne to mujh se ḳhafā hue kyuuñ log
kisī kā naam mirī dāstāñ meñ thā hī nahīñ
to kis sabab se ġhalat-fahmiyāñ huiiñ paidā
ba-juz havā to koī darmiyāñ meñ thā hī nahīñ
vo jis se shahr-e-'tasavvur' meñ raushnī hotī
sitāra aisā koī āsmāñ meñ thā hī nahīñ
musafiron ke ye wahm-o-guman mein tha hi nahin
ki rahbar to koi karwan mein tha hi nahin
sawal ye hai ki phir aag lag gai kaise
koi diya to andhere makan mein tha hi nahin
uTha liye gae hathiyar phir tahaffuz ko
ki shahr-e-amn mein koi aman mein tha hi nahin
to lazima use aana tha is zamin par hi
ki aadmi ka guzar aasman mein tha hi nahin
sunai main ne to mujh se KHafa hue kyun log
kisi ka nam meri dastan mein tha hi nahin
to kis sabab se ghalat-fahmiyan huin paida
ba-juz hawa to koi darmiyan mein tha hi nahin
wo jis se shahr-e-'tasawwur' mein raushni hoti
sitara aisa koi aasman mein tha hi nahin
Source: Book : Seepiyon Ki Qaid men Author : Yaqoob Tasawwur Publication : Yaqoob Tasawwur
Leave a comment