istāda hai jab sāmne dīvār kahūñ kyā
hāsil bhī nahīñ rauzan-e-darkār kahūñ kyā

lagtā to hai kuchh diid ko nā-dīd ke pīchhe
khultā nahīñ manzar koī us paar kahūñ kyā

huuñ tañg zarā jeb se ai hasrat-e-ashyā
shāmil to hai fahrist meñ bāzār kahūñ kyā

jis baat ke inkār kā had-darja gumāñ hai
vo baat yaqīñ ke liye sau baar kahūñ kyā

maiñ un ke javābāt se aur ahl-e-zamāna
haiñ mere savālāt se bezār kahūñ kyā

jis baat pe thī bahs huī bahs se ḳhārij
ab rah ga.ī aapas meñ hai takrār kahūñ kyā

ham-sā.e kī ham-sā.e se pahchān nahīñ hai
paivast hai dīvār meñ dīvār kahūñ kyā

ġhāfil nahīñ aisā bhī maiñ ab apnī rasad se
is dil meñ talab kā hai jo ambār kahūñ kyā

gulzār sā khil uThtā hai ḳhushbū-e-suḳhan se
jaadū hai vo is kā dam-e-guftār kahūñ kyā

hai rañg badan kā luġhat-e-rañg meñ nāpaid
lā-sānī hai qāmat meñ qad-e-yār kahūñ kyā

istada hai jab samne diwar kahun kya
hasil bhi nahin rauzan-e-darkar kahun kya

lagta to hai kuchh did ko na-did ke pichhe
khulta nahin manzar koi us par kahun kya

hun tang zara jeb se ai hasrat-e-ashya
shamil to hai fahrist mein bazar kahun kya

jis baat ke inkar ka had-darja guman hai
wo baat yaqin ke liye sau bar kahun kya

main un ke jawabaat se aur ahl-e-zamana
hain mere sawalat se bezar kahun kya

jis baat pe thi bahs hui bahs se KHarij
ab rah gai aapas mein hai takrar kahun kya

ham-sae ki ham-sae se pahchan nahin hai
paiwast hai diwar mein diwar kahun kya

ghafil nahin aisa bhi main ab apni rasad se
is dil mein talab ka hai jo ambar kahun kya

gulzar sa khil uThta hai KHushbu-e-suKHan se
jadu hai wo is ka dam-e-guftar kahun kya

hai rang badan ka lughat-e-rang mein napaid
la-sani hai qamat mein qad-e-yar kahun kya