husūl-e-maqsad meñ āḳhirash yuuñ rahegī qismat daḳhīl kab tak
tum apnī nākāmiyoñ pe doge muqaddaroñ kī dalīl kab tak

samundaroñ kī riyāsatoñ ko luTā ke āvāra phirne vaalo
ab ek qatre kī minnatoñ se karoge ḳhud ko zalīl kab tak

tū mard-e-momin hai apnī manzil ko āsmānoñ pe dekh nādāñ
ki rāh-e-zulmat meñ saath degā koī charāġh-e-alīl kab tak

jalāl-e-rafta ko bhuul bhī jā zarūrat-e-hāl par nazar kar
rakhe gā chūlhe kī aag ThanDī pa.e-vaqār-e-qabīl kab tak

darāzi-e-qad se aadmī ko nasīb hotī nahīñ bulandī
tujhe fareb-e-farāz degī ye kajkulāh-e-tavīl kab tak

husul-e-maqsad mein aaKHirash yun rahegi qismat daKHil kab tak
tum apni nakaamiyon pe doge muqaddaron ki dalil kab tak

samundaron ki riyasaton ko luTa ke aawara phirne walo
ab ek qatre ki minnaton se karoge KHud ko zalil kab tak

tu mard-e-momin hai apni manzil ko aasmanon pe dekh nadan
ki rah-e-zulmat mein sath dega koi charagh-e-alil kab tak

jalal-e-rafta ko bhul bhi ja zarurat-e-haal par nazar kar
rakhe ga chulhe ki aag ThanDi pae-waqar-e-qabil kab tak

daraazi-e-qad se aadmi ko nasib hoti nahin bulandi
tujhe fareb-e-faraaz degi ye kajkulah-e-tawil kab tak